საცხოვრებელი სახლი წავკისში

უკანა ეზო სრულად იზოლირებულია ქუჩის მხრიდან , რაც მაცხოვრებლებისთვის მყუდრო და დაცულ გარემოს ქმნის. მთავარი შესასვლელი საფეხურებით უკანა ეზოს დონეზე ავწიეთ, რათა ტერასიდან აუზის ზონაში გადასვლა ბუნებრივად და კომფორტულად მომხდარიყო. ამგვარად, შევქმენით ორი ძირითადი დონე – შესასვლელის მხარე და უკანა ეზო, რომლებიც გონივრული დაგეგმარებით ერთმანეთთან ინტეგრირდება.

არქიტექტურული კონცეფციის ფორმირებისას ჩვენი მიზანი იყო თანამედროვე და გამორჩეული დიზაინის შექმნა. შენობის გეგმარებამ საწყის ეტაპზევე განსაზღვრა მისი დინამიკური ფორმები, რომლებიც საბოლოოდ ვიზუალურად მიმზიდველი და საინტერესო გამოვიდა. ფასადზე შერჩეული მასალები, ხის პანელები და კერამიკული ფილა, სახლს სითბოსა და ელეგანტურობას სძენს, ხოლო შავი მეტალის ჩანართები თანამედროვე იერსახეს აძლიერებს, ქმნის ფერებისა და ტექსტურის ჰარმონიულ კომბინაციას.

მიუხედავად ტერიტორიის კომპაქტურობისა, ეზოს მაქსიმალურად ეფექტიანი გამოყენება ჩვენი ერთ-ერთი პრიორიტეტი იყო. სახლის გარშემო მეტალის ჩარჩოებში ჩამაგრებული საყვავილეები განვათავსეთ, რომლებიც აუზის ზონას მეტ სიმყუდროვესა და ბუნებრივ ჰარმონიას სძენს.

საბოლოოდ, ეს პროექტი წარმოადგენს თანამედროვე არქიტექტურის საუკეთესო მაგალითს, სადაც მასალების ჰარმონიული შერწყმა და ფუნქციური დაგეგმარება გამორჩეულ დიზაინთან ერთად ქმნის უნიკალურ საცხოვრებელ გარემოს.